Таһир КӘРИМОВ автор яңалыклары

Милләт тарихында Әнәк елъязмасы

Көнчыгыш Кама аръягы – аз өйрәнелгән, татарның җир олыслары кебек уникаль тарихы булган төбәкләрдән берсе. Биләмәчеләрдән, алар рөхсәте яисә аннан башка килеп утырган халыктан торган җир олыслары Казан ханлыгы чорыннан ук яшәп килгәннәр, хөкүмәткә даими салым (ясак) түләп баруны тәэмин иткәннәр. Җир олыслары зур үзәк авыл исеме белән аталган, кайда яшәвенә карамастан, биләмәчеләр дә кайбер очракта үзләрен шул авылдан дип күрсәтә торган булганнар. Әнәк һәм дистәләрчә татар авыллары башлангыч чоры Казан ханлыгына тоташкан Мөшегә җир олысы биләмәләрендә барлыкка килгән. Соңыннан ул Бүләр җир олысына кушылып, шул олысның Мөшегә төбәгенә (урыс чыганакларында «тюба») әйләнә.