Янып яши кеше вакытында,
гомере буе яна.
Ялкыннары һич тә сүрелмәс күк —
учак дөрләп кала.

Язмышларын әйтеп буламыни
дөрләп янган чакта?
Чорлар кайдан, еллар кайдан килә,
җилләр кайсы яктан…

Сүнә уты. Җилләр ала көлен.
Кайда урыннары?
Чылбыр исән.
Ләкин, өзек-өзек,
җитми буыннары…

Өзек буын инде өзек тора.
Кемнәр ялгый алсын?
…Әйтеп булмый алдан: күпме янар —
бездән дөрләп калсын!

Кадыйр СИБГАТУЛЛИН


Комментарий язарга