Туган ягы кирәк кешегә

Читтә йөргән чакта, сагындырып,
Керер өчен төнлә төшенә,
Зәңгәр таңлы, биек аяз күкле
Туган ягы кирәк кешегә.
 
Зур уңышлар яулап, заманалар
Матур бәя бирсә эшенә, –
Шатлыкларын ирештерер өчен
Туган ягы кирәк кешегә.
 
Йөри-йөри күңеле тупасланса,
Тузан кунса яшьлек хисенә, –
Бер сафланып килер өчен тагын
Туган ягы кирәк кешегә.
 
Яшәр өчен бетмәс көч алырга
Олысына һәм дә кечегә, –
Мәхәббәтле, ямьле, мәрхәмәтле
Туган ягы кирәк кешегә.
1976
 

Фәнис ЯРУЛЛИН

Фото: https://pixabay.com/