Көтеп алган идем җәйнең

Сандугачлы айларын,

Ишетеп кенә булмады

Сандугачлар сайравын…

 

Сандугачлар моңын тыңлар

Идек тә без гел генә,

Сандугачлар сайрар чаклар

Бары бер мизгел генә.

 

Сандугачлар күп сайрамый,

Сайрый ләкин өздереп.

Туктаусыз сайраса, күптән

Бетәр иде биздереп…

 

Быел алар минсез генә

Сайрый торгандыр инде.

Мин булмагач, аларның да

Күңеле тулгандыр инде…

 

Аларның үз вакытлары…

Мине көтмәсләр инде.

Үз җырларын җырламыйча

Җәйдән китмәсләр инде…

 

Күрмәсәм дә быел җәйнең

Сандугач сайрар чагын,

Сайрарга тора, сайрарга…

Сандугач тулы җаным.

13.06.2019

 

Роберт МИҢНУЛЛИН

Фото: ачык чыганаклардан алынды

 

«Мәйдан» №6, 2020 ел.


Комментарий язарга