«Килеп җитте лә минем дә...»
Ренат Харис шигыре.
Килеп җитте лә минем дә
көчсез, ялварыр чагым.
Арыган, талган канымны
ял иттер әле, җаным.
Эшсез генә, сүзсез генә
янымда утыр әле,
колакка — тынлык, күзләргә
зәңгәр төн тутыр әле.
Төндә калсын бар яктылык,
җылылыгың балкуы,
ә тынлыкта тик бер тавыш —
синең сулыш алуың.
Ренат ХАРИС
Фото: https://ru.freepik.com/Изображение от wirestock
Комментарийлар