Хәлегез ничек?
Рим Идиятуллин шигыре.
Ай-уракның иңбашына
Эленгән бишек;
Күкне биләү иткән сабый,
Хәлләрең ничек?
Калка кояш, төннең кара
Пәрдәсен тишеп;
Таңны уяткан гашыйклар,
Хәлегез ничек?
Атлый солдат, утлы-бозлы
Тауларны кичеп;
Сыкрый Ана: «Балакаем,
Хәлләрең ничек?»
Өлгесе ватык тәрәзгә
Кар сала ишеп;
Ир вафатын кичкән хатын,
Хәлләрең ничек?
Адашкан юлчы да килеп
Какмады ишек;
Үлем көтеп яткан әби,
Хәлләрең ничек?
Кайлардан кемнәр эндәшә
Хафага төшеп?
Җирдәге җан ияләре,
Хәлегез ничек?..
Хәлегез ничек?
Комментарийлар