Якты хыял

Якты хыял, зур өметләр белән

Күңелем көтте сине бүген дә.

Син килмәдең, иркәм, күренмәдең,

Язгы ерганаклар карны ерды,

Җил сызгырды ишек төбендә.

Елмаюлы өмет миләүшәсе

Тамыр җәя бара күңелемдә.

Көттем сине, иркәм, сагынып көттем,

Син килмәдең, шомырт исе килде,

Былбыл йөрде тәрәз төбемдә.

Тырышсам да сине онытырга,

Син һаман да күңлем түрендә.

Көттем сине түземсезлек белән,

Син килмәдең, сары яфрак килде,

Яңгыр йөрде тәрәз төбемдә.

Актык чиккә җитеп сагынам сине,

Көнем дә син минем, төнем дә.

Секундларны санап сине көтәм,

Син һаман юк, иркәм, карлар уйный,

Буран елый йөрәк түремдә.

Әхмәт ЕРИКӘЙ

Фото: https://ru.freepik.com/Изображение от freepik