Аттай чаба вакыт

Көзләр инде, көзләр урман-кырда,

Күңелдә дә алтын сорылык!

Кышлар диеп канат кагынабыз,

Яшәсәк тә язны сагынып.

Көз айлары котып кебек бүген,

Якты кояш, юкса, җитәрлек.

Гомер тагын кышка авып бара

Торган көннәр яшәү күтәреп.

Үтә еллар, үтә, сизелми дә,

Этеп-тартып гомер чанасын.

Нишләсә дә, кеше дөньялыкта

Тоймый кала яшәү чамасын.

Ел фасылы бер көн кебек уза –

Карамый да артка борылып,

Киртәләр дә аңа корып булмый, –

Аттай чаба алга ыргылып…

Фото: https://ru.freepik.com