Әни

«Кичә төндә, — дидең, — ай тотылды,

И жәлләдем айны, бәгырем».

Әни, әни, түп-түгәрәк чакта

Белсәк икән айның кадерен.

Бик сагынсам сине, күккә карыйм,

Син үзең дә ай күк, и әни!

Бүген айның бер кырые китек —

Күңелемә булды әллә ни.

Бүген синең бер шатлыгың кимдер:

Уйларыңда миндер, мөгаен...

...Сарлан күкләренә барып чыксаң,

Әниемне күрче, и аем!

Хәбәрләрем җиткер, кайтыр, диген,

Тиздән кайтыр, диген, савыгып...

Әни, әни, синең сагышларың

Баш очымда тора ай булып.

Фото: https://ru.freepik.com/Изображение на Freepik