ЯҢА ИРТӘ

Һәр иртәнең сөенчесен алам,
Өр яңа бит, яңа туган гына!
Яшел үлән елык-елык килә,
Иртәнге чык әле юган гына.
 
Үткән көнне куып тоталмадым,
Ничек кенә булды йөгергәнем...
Ә яңасы әле шундый чиста,
Бер хата да ясап өлгермәдем.
 
Белсәң иде, бу нинди көн булыр −
Бәхетнеме ныграк тояр өчен?
Ни булса да, ул барыбер миңа
Бирелә бит Сине сөяр өчен...
 
...Сөенчесен алып, каршы бардым,
Сөенече калсын − озатканда.
И, бу көнем үкенмәслек булсын,
Еллар хәтеремне кузгатканда.
 

Гөлсәрия БАСЫЙРОВА

Фото: https://ru.freepik.com/