Розаларны капларга онытмагыз!
Синоптиклар -10 градуска кадәр салкыннар фаразлый.
Быел көз бик җылы килде, шуңа да гортензия һәм роза кебек чәчәкләрне соңрак капларга туры килә. Синоптиклар төнлә -10 градуска кадәр салкыннар, кар явуын фаразлый. Димәк, ныклап туңдырганчы күпьеллык чәчәкләрнең өсләрен капларга кирәк булачак.
Роза куакларын бик иртә ябарга ярамый. Алар 5 градус салкынлыкны да яхшы кичерә. Түбән температура чәчәкләрне чыныктыра гына. Ә менә һава температурасы 6-7 градуска төшкәч, розаларны капларга кирәк. Сабаклары 50 сантиметр калдырып киселгән куак төпләренә 10-15 сантиметр биеклектә коры субстрат — ком, вак йомычка, ылыслы пычкы чүбе кушылган яфрак черемәсе өеп чыгарга кирәк. Ә менә гортензия төпләренә әче торф салып чыгу бик яхшы нәтиҗә бирәчәк.
Һәр куакны агач тартма белән каплап, өстенә пленка ябарга һәм кырыйларын кирпеч белән бастырырга. Ә иң уңайлысы — һәр куакны спанбонд яисә лутрасил кебек тукыма белән 4-5 кат уратырга, бау белән бәйләргә һәм өстеннән капчык яисә чиләк кидереп куярга.
Кар яугач, розаларны кар белән капларга онытмагыз, шулай эшләгәндә алар кышкы салкыннарда яхшы сакланачак.
Тагын бер киңәш: чәчәкләрне коры көнне каплагыз!
Автор: Зөлфия Фәтхетдинова
Фото: https://ru.freepik.com
Чыганагы: https://kiziltan.ru/articles/poleznoe/2024-10-12/rozalarny-kaplarga-onytmagyz-3965145
Комментарийлар