Карабодай оны нәрсәдән файдалы?

Онны кибеттән сатып алырга, яки үзең ясарга була. Моның өчен карабодайны яхшылап юып киптерәсең һәм каһвәтарткычтан чыгарасың.

Карабодай оны кан тамырларын, нерв системасын ныгыта, матдәләр алмашы бозылганда булыша, ашказаны-эчәклек трактына уңай йогынты ясый.
Карабодай оны үт бүленеп чыгуны яхшырта. Бер стакан кефирга бер аш кашыгы карабодай оны салып, төнгә калдырабыз да иртән эчәбез.
Атеросклероз вакытында көненә ике тапкыр - иртән һәм кичен 100-150 грамм карабодай кесәле эчәргә кирәк. Бер стакан салкын суга өч аш кашыгы карабодай оны салып болгатабыз. Аерым бер литр су кайнатабыз һәм аңа карабодай оны салынган суны кушабыз. 8-10 минут пешерәбез дә эчәбез.
Калкансыман биз авыруларыннан: бер стакан әстерхан чикләвеген яхшылап төябез. Аңа бер стакан карабодай оны белән бер стакан карабодай балы салып болгатабыз. Пыяла банкага салып, суыткычта саклыйбыз. Атнага бер тапкыр әлеге катнашма белән чәй эчәбез, дип яза “Саулык. Татар халык медицинасы”.