Имтиханнар һәр төбәктә дә уза. Шул исәптән, Кырым белән Севастопольдә дә. Гомумән алганда, имтихан тапшыру өчен 5700 пункт әзерләнгән. Имтиханнарның барышын 1000 федераль иҗтимагый күзәтүче һәм 2000 онлайн-күзәтүче карап торачак. Имтиханнар уздырылган барлык аудиторияләргә дә видеокүзәтү җайланмасы урнаштырылган. Шуларның 83 %ы онлайн режимда эшли.
Бердәм дәүләт имтиханнары 14 предмет буенча, резерв көннәрне дә кертеп, 27 май – 30 июнь аралыгында уза. Мәҗбүри фәннәр – рус теле һәм математика. Аттестат алу өчен аларның икесен дә тапшырырга кирәк.
Сайлап алынучы имтиханнар арасында иң киң таралганы – җәмгыять белеме. Аны имтихан тапшыручыларның 59 %ы сайлаган. Аннан соң физика – 28 %, тарих – 23 %, биология – 21 %, химия – 13 %, инглиз теле – 12 %, информатика – 10 %, әдәбият – 8 %, география – 4 % фәннәре килә.
Бүген Татарстанда сайлап алынган фәннәр – географиядән – 164 һәм әдәбияттан 945 укучы имтихан тапшыра. Әдәбияттан имтиханны тапшыру өчен 3 сәгать 55 минут, ә география өчен төгәл 3 сәгать вакыт каралган. Татарстанда әлеге имтиханнар өчен 17 пункт каралган. Әдәбият өчен минималь балл – 32, ә географиягә – 37. Нәтиҗәләр 8 июньдә билгеле була.
Комментарийлар