Бүген чыгарылыш имтиханы бирү өчен гариза тапшыруның соңгы көне

Рособрнадзор хәбәр иткәнчә, чыгарылыш сыйныф укучылары бердәм дәүләт имтиханы тапшыру өчен гаризаларны бүген биреп бетерергә тиеш, дип хәбәр итә "Татар-информ" МА.
Фото: Илнар Тухбатов
Укучылар гаризаны укыган мәктәпләрендә тапшыра ала. 1 февральдән соң гариза тапшыру өчен махсус комиссия карары кирәк булачак.
Имтиханны вакытыннан алда тапшыру 21 марттан 11 апрельгә кадәр булачак. Узган елгы чыгарылыш укучылары шушы вакытта йә төп периодка кадәр резерв көннәрендә имтихан тапшыра ала.
Бердәм дәүләт имтиханы бирүнең төп вакыты 28 майдан 20 июньгә кадәр булачак.