«Казык бавы чалып бәйлә, кызым!

Сүталмассың хәтта үзең дә!» —

Дигән идең…Ай

-һай, күпме мәгънә⠀

Булган икән, әти, сүзеңдә…⠀

 

Казык бавы чалып бәйлә, кызым!…⠀

Сүтелерлек бүшән булмасын…⠀

Юкса, кыз бала бит… малай түгел…⠀

Каян сиздең кирәк буласын?⠀

 

Казык бавы чалып бәйлә, кызым!..⠀

Беләм, кипкәч бушап каласын…⠀

Артык кыссаң бүген, әти, үзең⠀

Себеркегә охшап каласың…

 

Казык бавы чалып бәйлә, кызым!..⠀

Бәйлим-сүтәм…очы күренми…⠀

Капчык бавы гына түгел, әти…⠀

Без дигәнчә генә үрелми…⠀

 
Казык бавы чалып бәйлә, кызым!…⠀

Безнең өйрәнгәннәр чүп икән!?.

Сүтеп азапланмый, кисеп кенә ⠀

Алучылар, әти, күп икән…⠀⠀

 

Казык бавы чалып бәйлә, кызым! ⠀

Чабынганда, китмәс таралып…⠀

Себеркесез чаба дөнья, әти…⠀

Бетә күрмәсен дип каралып… ⠀

 

Себерке дә бәйләгән юк күптән…⠀

Май канатлары да үргән юк…

Бар нәрсә бар… Синле чаклардагы

Рәхәтлекне генә күргән юк…

 

Мин зарланмыйм, Әти!

Тамырымның көчен тоеп яшим…

Фатыйхаң бар, алга әйдәгән!

Шөкер, иман — күңел түребезгә

Казык бавы чалып бәйләнгән!…⠀

 

Ризәлә ИСМӘГЫЙЛЕВА

Фото: https://pixabay.com/

«Мәйдан» №6, 2020 ел.


Комментарий язарга