Галәмгәчә, нурлар чәчә-чәчә
Сүзләр канатлансын!
Әнкәйләрнең исемнәре – чәчәк
Мәңге кабатлансын!

Күкрәк сөте аша безгә иңгән
Телебезнең назы.
…Ана булып коча балаларын
Сөю кайтавазы…

Бар дөньяга терәк – хатын-кызда –
Кеше затлылыгы!
…Бишек җырын хәтерендә саклый
Җанның ак тынлыгы…

Язмыштырмы, ялгыштырмы, безләр
Бактык далаларга?..
…Ак алтыннан һәйкәл кояр идем
Газиз аналарга!

Бу тормышта Кем бар кадерлерәк?!
Сорый күң(е)лем сазы*.
…Аналарны котлап, шатлык сулап
Килсен бәйрәм язы!

Айрат Суфиянов

Форсаттан файдаланып, ана булган, ана булачак
барча-барча хатын-кызларыбызны чын күңелдән олы
бәйрәм белән кайнар котлыйм!Сезгә корычтай сәламәтлек,
гаилә бәхете, иминлек, бәрәкәт, мәхәббәт, матурлык,
балаларыгызның игелеген күреп озак еллар шатлык-куанычта
яшәвегезне телим!Әмин


Комментарий язарга