Башым чөеп төнге күккә карыйм –
Сокланырлык йолдыз диңгезе!
Меңәрләгән йолдыз-йолдызчыклар –
Шул микәнни Галәм нигезе?

Җемелдәшеп янган йолдызларның
Тирәсендә ниләр бар икән?
Әллә кая оча кеше уе,
Акыл өчен Галәм тар икән!

Ул йолдызлар безне чакыра микән:
«Бер килегез, – диеп, – кунакка!»
Айлы төндә йолдызларга карыйм,
Уем оча һаман шул якка…

Лерон ФАЗЛЫЕВ

Фото: https://www.pexels.com/