Хәтер

Кузгаткандай болыт кәрваннарын,

Агыла да агыла

Биниһая карга көтүләре

Су агымы ягына.

Кара чоңгыл төсле актарыла

Авыр болыт дулкыны;

Ачы сөрән чайпалдыра аны,

Көзге юлга чыктымы.

Канат җилпенгәнгә бимазасы

Кузгаладыр томанның;

Кайтавазы йөри таудан тауга

Баштан узган шомнарның.

Өзгәләнеп хәтер чоңгыллары

Идел-ярга кагалар.

Оялары тузгыгандай, таңнан

Бәргәләнә каргалар…

Фото:  https://ru.freepik.com