Үз башың

Меңнәр «кара» дип торганда
«Ак!» дияргә,
Меңнәр «чүп» диеп узганда
«Ах!» дияргә.
Ясалмалык төтенендә
Чын калырга.
Ышанырга тик күңелең
Кушканына.
Флюгерлар торсын, әйдә,
Югарыда.
Үз-үзеңнән коллык кортын
Кубарырга!
Буш алкышка кушылмаска!
“Буш!” дияргә.
Башсызлар күрмәгән утка
Баш ияргә.
Текә тотар өчен ул баш
Авыр да соң,
Әмма бәйсез рухың горур,
Бар үз башың.

Нурия ИЗМАЙЛОВА