Тамыр

Кояшка ук сузмыйм нәфесемне,
Үз эшемне кылам сабыр гына.
Ахрысы, мин тормыш агачында
Чәчәк түгел, гади тамыр гына.
Ә чәчәкләр шаулый язлар саен,
Дөньясына хуш ис тараталар.
Алар өчен кызлар башын җуя,
Чал картлар да үлеп яраталар.

Чәчәкләргә яуган мактауларны
Тыңлап торам шулай сабыр гына.
Алар өчен эчтән шатланам мин,
Үзем болай гади тамыр гына.

Әй шатланам! Кара җирне ертып,
Татлы матдә эзлим алар өчен.
Мин бит тамыр! Миңа бар дөньяга
Күрсәтергә кирәк чәчәк көчен.
Мин беләм бит, язын шаулау өчен,
Чәчәкләргә булсын тамыр гына!
Мин аларга татлы матдә эзләп,
Кара җирне ертам сабыр гына.

Фото: https://ru.freepik.com