Тагын кердек көзләргә

Уйландыра көзгә кергәч
Яфракның сарылары.
Әллә соң агачлар шулай
Сагыштан арынамы?
 
Утлы күмергә охшаган
Яфракның кызыллары.
Нигәдер кадерлерәк күк
Гомернең узылганы.
 
Барсына да битараф күк
Яфракның яшелләре.
Әллә сагыш-моң дигәнен
Алар соң яшергәнме?
 
Туктаттым да, беркөн шулай
Сорадым ил картыннан:
«Ник моңаеп карыйсың, – дип,
Киткән кошлар артыннан?»
 
– Төгәл генә җавап юктыр,
Җиңел(е)рәген сора.
Яшәгән саен, үткәннәр
Ныгырак сагындыра.
 

Рифкать ИМАЕВ

Фото: https://ru.freepik.com/