Өйрәник әле серләрен

Өйрәник әле серләрен,
болыт телен өйрәник –
ләйсән булып яварбыз.
Чакма чагып, очкын табып,
без ут телен өйрәник –
кара төндә янарбыз.
Адашканга юл булыр,
чакма теле шул булыр.
Күп беләбез, дип сөйләнмик,
судан да тел өйрәник –
дәрьяларга агарбыз.
Дәрья ерак… Без иң башта
тамчы телен өйрәник –
яз җитте дип тамарбыз.
Тама-тама күл булыр,
тамчы теле шул булыр.
Абага телен өйрәник!
Җиде төн урталарында
чәчкә атып карарбыз…
Силә телен, сиртмә телен,
бишек телен өйрәник –
илгә бәби табарбыз.
Кыз булмаса, ул булыр,
абага теле шул булыр…
 

 Мәхмүт ГАЗИЗОВ

Фото: vk.com