Кояш чыккан кайтыр юлларга

Ил капкасын кагам...
Өр-яңадан
Өлгердем мин җиргә туарга,
Кичерерсез, туры килә хәзер
Үз урнымнан сезне куарга.
 
Сез талаган бөтен хәзинәне
Кайтарыгыз димим берьюлы.
Канун китабына теркәгез, мин –
Кай җирләрдә туган, кем улы?!
 
Икенчесе – минем туган телне
Кире кайтарырга сез тиеш:
Тик карагыз,
«Әнкәй» дигән сүзнең
Моңы торган булсын шул килеш!
 
Бу ике шарт үтәлергә тиеш,
Үтәлергә тиеш бүгеннән.
Тереләчәк телем. Үз уллары
Коткарачак аны үлемнән.
 
Тереләчәк Иман!
Ул әлегә
Далаларда йөргән бер качак...
Ул адашкан барлык балаларын
Үз өенә алып кайтачак.
 
Без куылган идек.
Өр-яңадан
Өлгердек бит җиргә туарга!
Кояш чыккан... халык йөрәгенә
Алып кайта торган юлларга.
 

 Рәшит ӘХМӘТҖАНОВ

Фото: https://ru.freepik.com/Изображение от wirestock