Кеше булыйк

1

Кәүсә буйлап авыр яшел сутын
Җир кояшка таба куа ник?
Күзне ачып якты күргән саен,
кеше булыйк әле –
куаныйк!
 
2
Былбыл булып җырлый җәйнең җаны –
һуштан яза гөлле купшылык.
Безнең күкрәктә дә моңнар яши,
кеше булыйк әле –
кушылыйк!
 
3
Тамырларын яфраклары белән
һәрбер агач, үлән каплый ник?
Иң борынгы изге гадәт – шушы,
кеше булыйк әле –
кабатлыйк!
 
4
Тагын Җиргә болыт балалары
коелалар актан киенеп...
Кемгә – кәфен, кемгә – туй күлмәге...
Ә без кеше булыйк –
сөеник!

Ренат ХАРИС

Фото: https://pixabay.com/