Юл

Баганада якты утлар сүнә-яна,
Тәгәрмәчләр ачы чыжлый борылышта.
Төн һавасын сулый-сулый кайтып киләм,
Юлым минем бер тормыштан – бер тормышка.

Гөрелдәшеп, машиналар бәрелешә,
Гомерләрме-тимерләрме күккә оча.
Һәлакәтем корбаннарын саный-саный
Юл тотамын ышанычтан ышанычка.

Тәрәзләрдә бер-бер артлы утлар сүнә,
Керфегемә җете кара яңгыр тама.
Галәмдәге йолдызларны күзли-күзли,
Кайтып барам яңа туар таңга таба.

Фото: https://ru.freepik.com/Изображение от freepik

«Мәйдан» № 11, 2023 ел