«Чәчләремне җил таратмас...»

Чәчләремне җил таратмас –
Тарап-үрдем, яулык яптым.
Җандай якын сурәтеңне
Чыраларга телеп яктым.
 
Хисләремне җил таратмас –
Йөрәгемә элдем йозак.
Соң аңладык бу дөньяны:
Бәхет – кыска, сагыш – озак.
 
Җырларымны җил таратмас –
Көй югалган бәгырьләрдә.
Ике гашыйк көч тапмадык
Мәхәббәтне кадерләргә.
 
Гөнаһларны җил таратмас –
Мизаннарда бары бизмән.
Ялгышларым аша атлыйм
Җилгә каршы яңа эздән.
 

Гөлүсә БАТТАЛОВА

Фото: https://ru.freepik.com/ Изображение от Freepik