Бөре

Син дә март бөресемени?! –
Күзен яз ачкан бөре.
Мин сәер уйлар эчендә
Сине күргәннән бирле.
 
Тик матурлыкка лаектыр
Язны сыйдырган күңел.
Юккамы Кояш, нур белән
Тулган җырларың, сеңел?
 
Киләчәккә омтыламсың? –
Ашкынасың бигрәк син.
Теләкләрең чынбарлыктан
Узып аша күрмәсен!
 
Үсеш – катлаулы, күп анда
Чыны да, ялганы да,
Иртә чәчәк атканы да
Һәм... кысыр калганы да.
 
Йә, нигә бүген бу уйлар?
Син – бөре, яшел бөре...
Киләчәгеңә ышанам,
Сакласын бары ак хыял, –
Сакласын
Җаныңда туган бере…
 

Рәдиф ГАТАШ

Фото: Николай Туганов