Болытлар артында Кояш бар!

Усаллар, әрсезләр заманы...
Нәселдә һәммәбез юашлар.
Бабабыз әйтергә яраткан:
«Болытлар артында Кояш бар!»
Өметне югалту бик ансат,
Ни генә күрмәде бу башлар...
Башларны калкытты тик бер нур:
Болытлар артында Кояш бар!
Нәселне корытты, туздырды
Сугышлар, шәфкатьсез көрәшләр.
Нигә без таркалдык – ачыклар:
Болытлар артында Кояш бар!
Караңгы, болытлы күзләрдән
Сибелер шатлыклы күз яшьләр...
Без киткәч, дөньялар яктырыр:
Болытлар артында Кояш бар!
 

Илдар ЮЗЕЕВ

Фото: https://ru.freepik.com