БӘХЕТ КАРТАЯМЫ ИКӘН…

Иртәләгән яз, диделәр.
Ә көзләр соңламады.
Йөрәкләрдә гел яз икән, –
Йөрәкләр тыңламады…
Гомер фасылының инде
Язлары узган иде…
Ярсыган хисләрнең инде
Көлләре тузган иде…
Кайлардан пәйда булдың син,
Әллә көл арасыннан?
Әллә хыял болынының
Гөлләре ярасыннан…
Көзнең сукмаклары алтын,
Яфраклар – кыштыр-кыштыр:
Бәхет картаймыйдыр бит ул, –
Соң булса да, кавыштыр…
Мин түгел, яфраклар сөйли,
Алар да безнең хәлдә, –
Бәйдән ычкынгач, очарга
Талпына алар әле дә…
Иртәләгән яз, диделәр.
Көзләре иртәләгән!..
Мине – син, сине – мин түгел,
Башкалар иркәләгән…
 

Нәҗибә САФИНА

Фото: https://ru.freepik.com