Бәрәкәт

Әбием төбәлгән күкне

Дога ураган иде:

Оныгыма хәләл ризык

Яз!» – дип сораган иде.

Чәчемнән сыйпаган иде,

Аркамнан да сөйде ул.

«Хәләл генә бәрәкәтле

Була, балам,» – диде ул.

«Хәләл ничек күп булсын ди,

Күп була бары хәрам...»

Бер дә калмаса да чарам,

Хәрәмләшмичә барам.

Мең шөкер дим, көн туды исә,

Мең шөкер биргәнеңә.

Шөкер итсәм, кояш нуры

Тарала җан-тәнемә.

Шул нурдан яктыра өем,

Башка чикмәм күк иза.

Әллә нинди серле сүз ул,

Әллә нинди могҗиза!

Хатын-кыз телендә бигрәк

Кодрәтле ул, көчле ул.

Кабатланса да туйдырмый

Хәтта иртә-кичле ул.

Фирүзә ҖАМАЛЕТДИНОВА

Фото: https://ru.freepik.com/Изображение от  Freepik