Хәтер тавында

Син, дисәм... Чыңлый күңелнең
Көмеш кыңгыраулары.
Җилкенеп калка гомернең
Чаптар атлы еллары.
Син, дисәм... Исемең серен
Беркемгә ачмасам да ... –
Иң ләйсәнле гөл кабына
Исемнәр бакчасында.
 
Син, дисәм... Җиләкле җилне
Кушып үргән толымың
Искә төшеп, урап ала –
Шул толымың колы мин.
 
Син, дисәм... Хәтер тавында
Яшеннәр бәрелешә.
Бу – гомерлек якты әрнү –
Гел ерак, гел янәшә.
 
Син, дисәм... Иң чытлык йолдыз,
Чаткылап, күкне бизи.
Син киткән эзләрне үбеп,
Тәкъдир миңа кул изи…
 

Марсель ГАЛИЕВ

Фото: https://vk.com 

«Мәйдан» №10, 2021 ел.