Тарих җиле

Көнем өчен түгел, денем өчен.
Мәкаль
 
Булган көчле, гаярь чаклар,
Булган шанлы чаклар.
Хөр җилләрне узып чапкан
Безнең ярсу атлар.
Тоя йөрәк, ашкыл^* йөрәк,
Тоя тарих җилен.
Нигә көнем − булмый икән
Телем, халкым, илем?
Баса алмый йөрәгемне,
Үткәннәргә чабам.
Тарих җиле дәва: без бит
Башлам түгел, дәвам.
Тарих көле тояклардан
Каладыр бөркелеп.
Нигә көнем − булмый икән
Илем, халкым, телем?
Чабам, чабам үткән аша
Киләчәккә таба.
Тарих уты ат ялына,
Йөрәгемә каба.
Хаклар гадел хакланмыйча
Сүрелмәс бу ялкын.
Нигә көнем −  булмый икән
Илем, телем, халкым?
 
*ашкынучан
 

Рәфикъ ЮНЫС

Фото: Николай Туганов

«Мәйдан» № 10, 2022 ел