Таиландның 70 ел хакимлек иткән патшасы вафат булган

Бангкокта Таиланд патшасы Пхумипон Адульядет вафат булды. Патшага 88 яшь иде, ил белән ул 1946 елдан бирле җитәкчелек итте.

Адульядетның сәламәтлеге начараю турында мәгълүмат бар иде инде. Әлеге хәбәрдән соң хастахәнә янына меңләгән кеше килде.
Пхумипон Адульядет 1927 елның 5 декабрендә Массачусетс штатының Кембридж шәһәрендә туган. Бу вакытта аның әтисе Һарвард университетында укыган булган. Соңрак Адульядетның гаиләсе Таиландка кайта. 1946 елда абыйсы үлгәннән соң, Пхумипон тәхеткә утыра.
Таиланд патшасы илдәге ике сәяси көч арасында тынычлык урнаштыруда мөһим роль уйнаган шәхес.
Тәхеткә Адульядетнең бердәнбер улы – 64 яшьлек Маха Вачиралонгкорн утырыр дип көтелә.
 

http://www.azatliq.org