Кыл өстендә

Һай, тәвәккәл кыз икән!
Менгән нинди биеккә –
иң түбәгә, кыекка,
кыек
тигән болытка!
Кешене соң шул тикле
югарыга ни дәшә? –
йөрәкләнеп, җилкенеп
җиде күккә менмәсә…
Кыз язмышы биектә,
биектә, кыл өстендә,
тайсаң-нитсәң чүт кенә,
тотынырга күк кенә…
Кыл өстендә калмыйк, дип,
күпме тырыш-тырышма,
барысы да синеңчә
булып бетми тормышта.
Бизәлә йорт, агара,
кыз кулында пумала.
…Күңел барыбер шомлана,
кыл өстендә кыз бала…
 

Мәхмүт ГАЗИЗОВ

Фото: https://ru.freepik.com/photos/people'>People фото создан(а) Dragana_Gordic - ru.freepik.com