Күзгә карагыз

Туры итеп, нурлы итеп карый, –

Бусы карый чынлап.

Күзен кысып, мәрхәмәтле карый,

Бусы карый сынап.

Күзебезгә карый юмакайлар,

Карый алдакчылар.

Усал итеп караучылар була:

Өнне алмакчылар.

Усалына без дә усал итеп

Карап үткәрәбез.

Бик тырышсак, авыр карашны да

Җиңел күтәрәбез.

Йөрәкләргә текәп карау була, –

Буйсындыра хәтта.

Бер карашы өчен кылган эшең

Сыймас шәригатькә.

Куркам, шүрлим, нишләргә дә белмим,

Аңламыйм да:

Бик ваемсыз сыер күзе булса

Кеше маңгаенда.

Кадыйр СИБГАТУЛЛИН

Фото: Николай Туганов