Нәрсә әйтер иде авыллар?

Шәһәрләшеп беттек, күр син безне,
Үзебезне өстен тотабыз.
Бабайларның өметләрен кисеп,
Тамырларны җирдән йолкабыз.
Кызларыбыз чит кавемне сөя,
Барып чыктык, уйлап карагыз?
Ә оныклар Ана телен белми,
Инде урыслашып барабыз.
Мактанабыз, җае чыккан саен:
Чит тел белә бала-чагабыз!
Җан сызлагач, хәл җыярга диеп,
Чит илләргә чыгып чабабыз.
Җирне сөйгән – авырлыкка түзә,
Тик тырышлар яшәп калдылар.
Теле булса, чыгып киткәннәргә
Нәрсә әйтер иде авыллар?

Рәмзия ВӘЛИЕВА

Фото: https://ru.freepik.com/photos/flower'>Flower фото создан(а) freepik - ru.freepik.com