Хәтерсезлек

Галәветдиннең бармагы сынды. Шап кына иткән иде, шырт итте. Уң кулының урта бармагы, иң кирәклесе. Механизатор өчен аеруча...
Хастаханәдә бармакны кысып бәйләделәр, эштән азат итеп, язу бирделәр.
– Страхование алу өчен, документ тутырырга кирәк. Туры килгәндә, файдаланып кал, – дип киңәш бирделәр хезмәттәшләре. – Эш урынында имгәнгән өчен акчасы да күбрәк аның...
Галәветдин страхованиенең мәҗбүриенә дә, иреклесенә дә килешү төзегән иде. Икесенә дә акча тиячәген күз алдына китергәч, күңеле җылынып китте.
– Кайда һәм ничек сыну турында акт төзергә кирәк. Үзеңнән башка ике шаһит булсын, – дип өйрәттеләр аны инспекциядә.
Акт төзелде. Шаһит итеп Сафа белән Шаһи кертелде.
Госстрах инспекторы шаһитларның берсе белән очрашуны кирәк тапты. Инструкция шулай куша. Беренче булып Шаһи күзгә тап булды.
– Галәветдиннең бармагы сынганын раслыйсың, димәк? – диде инспектор аңа.
– Ник расламаска?
– Эш урынында булдымы?
– Механизаторлар йортында инде. Ул эш урынымы соң?
– Әйе. Өйдән эшкә чыгып китеп, урап кайтканчы, эш урыны чутлана.
– Әйбәт икән анысы...
– Шуннан... Ничек булды инде?
– Ничек дип... Рәхимнең дә күзен чыгара язды әле ул!
– Анысы тагын ни галәмәт?
– Ни галәмәт дип, Галәветдин кулын менә болай итеп баш өстенә күтәрде дә шап итеп өстәлгә сукты. Кулындагы доминосы очып китеп, каршысында утырган Рәхимнең күзенә тиде, ә үзенең бармагы сынган булып чыкты... Менә бит ул, бәла өстенә бәла! Ярый әле, эш урынында булды...
– Аңлашылды! – диде инспектор, ачулана төшеп. Аннары тавышын тагын да күтәреп, аптырап сорады: – Сез нигә эш урынында домино сугасыз соң?
– Кәрт алып килергә онытканбыз шул... – дип, ихлас күңелдән хәтерсезлекләренә үкенеп җавап бирде Шаһи.
 

Әмирҗан МОТАЛЛАПОВ

Фото: Ok.ru

«Мәйдан» №11, 2020 ел