ЗӘҺҮРӘ ӘБЕЛКАРАМОВА-КИРӘЕВА

Мин ‒ Зәһүрә Әбелкарамова-Кирәева булам. Башҡортостандың Әлшәй районы Ҡыпсаҡ-Асҡар ауылында тыүып үҫтем. Бөгөнгө көндә Башҡортостандың Дүртөйлө районы Иванай ауылында йәшәйем.

ИЛҺАМЛЫ ТӨБӘК
Тыуған яҡтарыма ҡайтһам,
Хисләнә минең күңел!
Уйҙарым оса йыраҡта,
Тыйып тотарлыҡ түгел!

Гүзәллегеннән еремдең
Күңелгә илһам тула.
Бигерәк нескә күңелдә
Шиғыр юлдары тыуа.

Матур уйҙар, сихри хистәр...
Ҡәләм алам ҡулыма.
Тәбиғәттең матурлығы
Минең йөргән юлымда.

Илһам алам, һиңә ҡайтып,
Ауылым-тыуған төйәк!
Һиндә тыуа шиғырҙарым,
Һин бит-Илһамлы төбәк!

ӘСӘЙЕМ ҺҮРӘТЕ
Әсәйем, һинең һүрәтең
Өйөмдөң иң түрендә.

Бер наҙлы ҡарашыңдан да
Күңелдә нур түгелә.

Һүрәтеңде ҡулға алып
Һөйләшәм үҙең менән.
Әйтерһең дә үткәндәргә,
Яныңа ҡайтып киләм.

Күҙҙәремә ҡарап, көн дә
Һорайһың хәлдәремде.
Кәңәш бирәһең, ҡәҙерлем,
Бик ауыр мәлдәремдә.

Аңлайһың, белеп хәлемде,
Һүрәттәндә әсәйем.
Һәр ваҡытта яндарымда,
Һине тойоп йәшәйем.

Күҙҙәреңә ҡарайым да
Тоям һымаҡ йылыңды.
Ҡояш һымаҡ яҡтыртаһың,
Әсәй, барыр юлымды.

БӘХЕТ ХАҠЫ
Бәхет хаҡы күпме тора?
Бәхетлеләр генә белә.
Бәхетһеҙ йәрҙәрҙе күреү
Бәғерҙәрҙе, беләм, телә.
.
Бәхет хаҡы күпме тора,
Алтындарға тиңме икән?
Бәхетле булып булалыр,
Кемделер бәхетле итһәң!

Бәхет хаҡы күпме тора,
Үлсәүҙәргә уны һалһаң?
Һөйгәнеңдән айырылып,
Әгәр яңғыҙ тороп ҡалһаң?

Бәхет хаҡы күпме тора?
Беләлер, өҙөлөп һөйгән.
Берен-бере өсөн һөйөү
Уттарында янып көйгән!

Бәхет хаҡы күпме тора?
Белә бергә һыуҙар кискән.
Икәүләшеп, иңдәр терәп,
Ҡайғы һурпаларын эскән!

Бәхет хаҡы күпме тора,
Кемдәр генә белә икән?
Бәхетлелер, ерҙә һәр кем,
Башҡаны бәхетле иткән...

ҠАТЫН-ҠЫҘ БӘХЕТЕ
Ир-егеттәр, һеҙҙән тора,
Ҡатын-ҡыҙҙың бәхете.
Наҙлы ҡараш, йылы һүҙҙәр ‒
Шул бит йәшәү рәхәте.

Яғымлы бер ҡарашығыҙ
Иретә таш күңелде.
Гөл-сәскәләр бәйләменән
Күңел наҙға күмелде.

Йәлләмәгеҙ ҡатын-ҡыҙҙан
Йән иретер шул һүҙҙе.
Шат йылмайһын улар көн дә,
Тик йәшләнмәһен күҙе.

Күпте өмөт итмәй улар,
Бүләктәр, алтын тәхет!
Ихтибар көтә күңелдәр,
Шуныһы оло бәхет!
 

ҠӘҘЕРЕН БЕЛЕП КЕНӘ
Йылмайып ҡаршы алайыҡ,
Һәр иртә атҡан таңды.
Яман уйҙар борсомаһын,
Томаламаһын аңды.

Атҡан таңды ҡаршылайыҡ,
Йылмайып, көлөп кенә.
Йәшәйек, ошо тормоштоң
Ҡәҙерен белеп кенә!

Ҡояштың яҡты нурҙары
Йәм өҫтәһен тормошҡа!
Ҡәнәғәтлек, яҡшы теләк
Булһын һәр бер ҡарашта.

Йәмле үтһен көндәребеҙ,
Күңелдәр беҙҙең тыныс.
Эшләгән яҡшылыҡтарҙан
Йәндә булыр ҡыуаныс!