Зәйдә шикәр чөгендере рекордлы уңыш бирә

“Зәй офыклары” газетасы язуынча, Зәй басу-кырларында үскән чөгендернең 28 проценты җыеп алынган инде.
Фото: s-kub.ru
Уңыш гектарыннан уртача 312 центнерны тәшкил итә. Иң зур уңыш “Зәй шикәре” агрофирмасында: гектарыннан уртача - 365 центнер. Агрофирма хезмәтчәннәре районда беренчеләрдән булып шикәр чөгендерен алуга керешкән. 2746 гектар мәйдан биләгән татлы тамырның 916 гектары алынган. “Заман” бүлекчәсе басуларыннан уңыш гектарыннан уртача 500 центнер тәшкил итә. Быел бу - рекордлы күрсәткеч. “Зәй шикәре” агрофирмасы җитәкчелеге чөгендерне ашлау, эшкәртүгә, яңа технологияләргә, чөгендер культурасын үстерүгә фәнни яктан якын килүгә игътибар бирә.
Соңгы елларда, елның коры булуын исәпкә алып, язгы-җәйге чорда чөгендер мәйданнарында күп эшләргә туры килә, гектарына тиешле үсенте туры килерлек итеп чәчелгән, чөгендер үсентеләрен корылыктан саклап калу өчен яфрактан өстәмә тукландыру чарасы үткәрелгән. Татлы тамыр чәчеләсе басулар, минераль ашламалар, аммиак кертелеп, яңа технология буенча эшкәртелә.