Торонтода Сабан туе үтте

Ураза ае тәмамланганнан соң, татар дөнясында Сабантуйларның яңа дулкыны башланды. Торонтода эшләп килүче "Берлек" оешмасы да 17 июль көнне Сабантуй бәйрәмен үткәрде.
Фото: http://www.azatliq.org
Торонтода яшәүче активист Ләйсән Харисова әйтүенчә, милли бәйрәмнәр 9 елдан артык үткәрелеп килә. Бу елгы милли бәйрәм Торонтоның Сentennial паркында үтте.
Якшәмбе көнне Сабантуй мәйданына, җирле татар-башкортлардан тыш, Монреал шәһәреннән, Торонтның казакъ, әрмән, грузин җәмгыятьләреннән чакырылган кунаклар җыелды, Шулай ук Американың Сан-Франциско Татар ассоцияциясе рәисе Туран Апакай, Румыния татарлары да булды.

Бәйрәмдә катнашкан активист Ләйсән Харисова сөйләгәнчә, Cабантуйны үткәрергә "Берлек" оешмасы җитәкчелеге һәм активистлары күп көч салган. Җитәкче Мирсылу Арсланова, активист Әлфия Боһадирова тырышлыгы белән балалар Тукайның "Шүрәле" әсәрен сәхнәләштерде. Балалар да, олылар да концерт күрсәтте, татарча, инглизчә шигыйрьләр сөйләде, төрле телләрдә җырлар башкарды. Мәсәлән, "Аерылмагыз" җыры татарча һәм башкортча җырланды.
Торонто бәйременә беренче килгән сабыйларга бүләкләр бирелде, алар арасында яңа туган Идрис, Зәйнәп, Адилә, Артур һәм Раян исемле балалар булды.
Фото: http://www.azatliq.org

Олылар да, кечкенәләр дә капчык белән сугышты, кашык тотып йөгерде, чүлмәк ватты. Бәйрәмнең ярышларын татар оешмасы активистлары Голнара Овезова һәм Әмир Җиһаншин алып барды.
Торонтода Татарстан, Башкортстан, Казакъстан, Үзбәкстан, Финляндия һәм башка яклардан килгән татарлар һәм башкортлар гомер итә. Алар "Берлек" оешмасына йөри һәм чараларны күмәкләп үткәрә.

Чыганак: http://www.azatliq.org