Сентябрьдән татарстанлылар ишегалларын төзекләндерү проектларын үзләре төзиячәк

8 сентябрьдән башлап Татарстан халкы үз ишегалларында башкарылачак эшләрне үзе сайлаячак. Бу хакта 20 август көнне ТР Министрлар Кабинетында үткән брифингта Татарстан төзелеш, архитектура һәм торак-коммуналь хуҗалык министры Ирек Фәйзуллин хәбәр итте.

“8 сентябрьдән тавыш биргәндә, Татарстан халкы ишегалларында башкарылачак эшләрне үзе сайлаячак. Бүген барлык ишегалларына, асфальт һәм юлларның торышына техник инвентаризация үткәрелә”, – диде Ирек Фәйзуллин.
“Татарстан Республикасы Президенты кушуы буенча өч ел дәвамында тиешле программаны гамәлгә ашыру күздә тотыла. Без күптән бернәрсә дә эшләнмәгән ишегалларына керәчәкбез”, – дип ассызыклады министр.
Ирек Фәйзуллин әйтүенчә, халык теләге буенча кече архитектура формалары белән бәйле эшләр башкарылачак. Моннан тыш контейнер мәйданчыклары төзекләндереләчәк һәм башка кирәкле эшләр башкарылачак.

Фото: Салават Камалетдинов

https://tatar-inform.tatar/news/2019/08/20/191893/