“Сәләт” лагерына 2-3 яшьтән балаларны йөртеп булачак

Хәзер балаларны “Сәләт”кә 2-3 яшьтән йөртеп булачак. Яңа проект инде сентябрь аенда ук гамәлгә ашырыла башлый.

“Фәнсар” мәктәбе кысаларында уздырылачак әлеге проект “Бәләкәч” дип исемләнгән. “Сәләт” оешмасының башкарма директоры Тимур Сөләйманов аңлатуынча, “Фәнсар” ел әйләнәсе эшли торган мәктәп. Хәзергә анда 4 смена ял итә. “Без нәниләр өчен дә смена ачарга ниятләдек. Хәзер “Сәләт”кә 2 яшьтән алып балалар да үзләренең әти-әниләре белән йөри алачак. Смена 3 көнгә исәпләнер дип күздә тотыла. Шулай ук атна саен төрле-төрле чаралар уздыру планлаштырыла”, - ди ул.
2002 елдан бирле эшләп килүче “Фәнсар” академиясе уку йортына йөреп һәм читтән торып укый торган мәктәп форматында эшли. Анда Россиянең алдынгы югары уку йортлары укытучылары белем бирә. “Фәнсар” – интеллектуаль йолдызлык” академиясенең дистанцион мәктәбе үз эшендә соңгы инновацион казанышларны куллана һәм һәр укучыга шәхси якын килә. “Фәнсар” академиясендә онлайн-мәктәп гамәлдә, сессияләр уза.