Киләсе уку елыннан укучыларның һәр фәннән белемнәрен тикшерә башлыйлар

Россия Мәгариф һәм фән министрлыгында 11 сыйныфта укучыларны бөтен фәннәр буенча да тикшерү турында сүз алып барыла, дип яза “ТАСС”.

Аны Бөтенроссия тикшерү эшләре дип атаячаклар.
Министр Ольга Васильева бу яңа чарадан курыкмаска өндәп: “контроль эшләрне укучылар мәктәптә болай да ел саен яза, ә бу очракта бердәм көндә бердәм биремнәр булачак”, - дип аңлата.  2016-2017 уку елында 11 сыйныфларда БДИга өстәп, тагын аерым тикшерү эшләрен үткәрү турында сүзләр күптән бара иде инде. Ул мәктәпне тәмамлаучы яшьләрнең гомуми белемен ачыкларга ярдәм итәчәк.