Казанда Хәсән Туфан турында спектакль күрсәтеләчәк

«Созвездие-Йолдызлык» арт-резиденциясендә «Свет далекой звезды» спектакленең премьерасы булачак. Спектакль рус телендә булачак. Сәхнә әсәре татар әдәбияты классигы Хәсән Туфан тормышы һәм иҗаты турында сөйләячәк. Спектакльның режиссеры — Татарстанның атказанган сәнгать эшлеклесе, Россиянең атказанган артисты Рәшит Заһидуллин.
«Спектакль биографик түгел. Хәсән Туфан тормышы һәм иҗаты аша репрессияләрдән зыян күргән барлык иҗат әһелләренең язмышын күрсәтергә телибез», — дип сөйләде Заһидуллин.
Әлеге спектакльне татар телендә дә куярга планлаштыралар.
Сәхнәгә куючы рәссам - Асель Исмәгыйлева. Композитор - Татарстанның атказанган сәнгать эшлеклесе Юрий Чаплин.
Спектакльдә «Созвездие-Йолдызлык» театры артистлары, Казан һәм Мәскәү иҗат вузларын тәмамлаучылар катнаша.
Спектакленең премьерасы 9 һәм 12 декабрьдә 19.00 сәгатьтә булачак.
 

Чыганагы: https://tatar-inform.tatar/news/culture/08-12-2021/kazanda-h-s-n-tufan-turynda-spektakl-k-rs-tel-ch-k