Быелгы «Каравон» программасы рус халкында кәләш озату йоласына багышланган иде. Һәр ансамбль үз төбәгендә кәләш озату йоласы үзенчәлекләрен күрсәтте. Пермь краеның Ольга Пичкалева сәнгать җитәкчелегендәге «Иволга» ансамбле кебек бөтен иҗат коллективы да кунакларны русларда яшь егет белән кызны ярәштерү, кызны яучылау, кәләшне туйга киендерү йолалары белән таныштырды.
Бәйрәм сәхнәсеннән «Каравон» кунакларын Татарстан Дәүләт Советы рәисе, республика халыклары Ассамблеясе җитәкчесе Фәрит Мөхәммәтшин сәламләде. Ул Татарстан Президенты Рөстәм Миңнехановның котлау мөрәҗәгатен ирештерде. «Бу көннәрдә Татарстанда милли бәйрәмнәр шаулап уза: кичә-бүген татар милли бәйрәме Сабан туйлары үтә, ә Никольскоеда рус фольклор бәйрәме «Каравон» гөрли. Киләчәк көнгә ышаныч бирүче моннан да зуррак бәхет бар микән? «Каравон»га кешеләр җан кушуы буенча ашкына, монда беркемне дә мәҗбүриләп китермиләр. Бәйрәм елдан-ел киңрәк колач җәя, ул бүген илкүләмендә билгеле мәдәни фестиваль. «Каравон»да катнашкан һәркем Лаеш җиреннән киләсе елга кадәр җитәрлек рухи көч җыеп китсен», - дип теләде Фәрит Мөхәммәтшин.
Шулай ук бу бәйрәмне Кырым парламенты делегациясе дә беренче тапкыр тамаша кылды. Иң элек бәйрәм белән котлап, Лаеш районы хакимияте башлыгы Михаил Афанасьев сүз алды. Ул борынгы мәдәни традицияләрне саклаганнары өчен Никольскоеның өлкән буынына һәм милли хәзинәләрнең югалуына юл куймыйча, аларны баеткан яшь буын вәкилләренә рәхмәтен белдерде.
«Каравон»да катнашучылар Татарстан мөфтие Камил хәзрәт Сәмигуллин, Казан һәм Татарстан митрополиты Феофаннан киләчәктә дә бердәм-тату булып, милләтләрне, диннәрне, традицияләрне хөрмәт итеп яшәргә өндәүләр ишетте.
Быел «Каравон»ның махсус кунагы буларак музыкаль чыгыш ясарга Мәскәүдән «Играй, гармонь!» телепроекты, «Частушки» ансамбле сәнгать җитәкчесе, Россиянең атказанган артисты Анастасия Заволокина чакырылган иде.
Комментарийлар