Дубай хөкүмәте кәгазьдән бөтенләй баш тарта

Дубай хөкүмәте 2021 елга кәгазь документ әйләнешеннән бөтенләй баш тартырга җыена.

Бу хакта Дубай принцы Хамдан ибн Мөхәммәд бин Рәшид Ал Мактум шәех белдергән. "2021 елдан соң хөкүмәтнең бер генә хезмәткәренә яисә заказчысына да кәгазьдә нинди дә булса документ бастырып чыгарырга кирәк булмаячак. Дубайдагы кәгазьдән баш тарту хәзерге көндә хөкүмәт тарафыннан кулланылучы миллиардтан артык кәгазь битен саклап калырга мөмкинлек бирәчәк. Нәтиҗәдә, бу башлангыч кешеләрне бәхетлерәк итәчәк һәм киләчәк шәһәрләре ихтыяҗын канәгатьләндерүдә зур роль уйнаячак", - дигән принц. Бу хакта "Русские Эмираты" сайты яза.
Хакимиятләре Дубайны дөньядагы иң алда баручы шәһәргә әйләндерү нияте турында белдергән иде инде.