Чаллының 28 кешесе «ТАССР төзелүгә 100 ел» медаленә лаек булды

Чаллыда ТАССРның 100 еллыгын ачу тантанасы узды. Аның кульминациясе Автошәһәр тарихына зур өлеш керткән шәһәрлеләрне бүләкләү булды. Бу хакта мэриянең мәгълүмат сәясәте һәм җәмәгатьчелек белән элемтә идарәсендә хәбәр иттеләр.

Тантана уңаеннан шәһәр Балалар һәм яшьләр иҗаты сарае фойесында тарих-туган якны өйрәнү музее һәм картиналар галереясы үз экспозицияләрен тәкъдим итте. Биредә 50 ел элек чыккан басмалар, шәһәр һәм Татарстанга багышланган картиналар, КамАЗның беренче төзүчеләренең көнкүреш әйберләре белән танышырга мөмкин иде.

«Чаллы - кабатланмас язмышлы шәһәр. Ул республикабызның һәм илебезнең социаль-икътисади үсешенә зур өлеш кертте. Без үз тарихыбыз белән горурланабыз, КАМАЗ белән горурланабыз. Әмма иң мөһиме, без чиста кырда дөньяда иң зур автомобиль заводларының берсен һәм заманча шәһәр төзегән кешеләр белән горурланабыз», - диде сәхнәдән Чаллы мэры Наил Мәһдиев, җыелганнарны сәламләп.

Кичәдә Автошәһәр үсешенә зур өлеш керткән 28 кеше бүләкләнде. Алар арасында Олимпия чемпионы Гөлнара Сәмитова-Галкина, Чаллы Сәүдә-сәнәгать палатасы советы рәисе Юрий Петрушин, Психоневрология диспансерының элеккеге баш табибы Исаак Беккер һәм башкалар бар.

Моңа кадәр яңа бүләккә беренче булып Татарстан Республикасының Беренче Президенты, ТР Дәүләт Киңәшчесе Минтимер Шәймиев ия булганлыгын хәбәр ителгән иде.