Бюджетта эшләүчеләрнең хезмәт хакы арта

Федераль бюджетта эшләүче һәм Россия Президентының май указларына кермәгән исемлектәге хезмәткәрләрнең хезмәт хакы 1 октябрьдән 4,3 процентка арта. Бу турыда "Российская газета" хәбәр итте.
Россия Хөкүмәте бу турыдагы боерыкны март аенда ук имзалады. Хезмәт хакын арттыру өчен акча федераль бюджетка салынган.
Мәсәлән, инженер, программист, электромонтер, слесарь, сантехник, техник, социаль психолог, бухгалтер, юрист кебек хезмәткәрләр хезмәт хакы артуын сизәчәк. Шулай ук янгын сүндерүчеләр, коткаручылар, океанологлар, метеорологлар, урманчылар һәм башкаларның да акчасы артачак, диелә хәбәрдә.
Бу исемлеккә дәүләт хезмәткәрләре дә керә. Шулай итеп федераль казна, бюджет һәм автономияле учреждениеләр, федераль дәүләт органнары, хәрби частьләрдәге гражданнар персоналының хезмәт хакы артачак.

https://tatar-inform.tatar/news/2019/10/01/194545/