“Бөек Болгар” Бөтенроссия урта гасыр сугышы фестивале узачак

Шулай ук балалар мәйданчыклары күп булачак. Сабыйлар 14-15 гасыр уеннарында күңел ача алачак. Урта гасырдагы эшләнмәләрне ясау, арбалеттан ату да булачак.
Фестиваль алдыннан махсус бәйгеләр уздырыла. Аларда катнашканнарга “Бөек Болгар” фестиваленең махсус валютасы – “булгарик”лар бирелә. Аңа ия булганнарга өстенлекләр була. Мисал өчен, түләүле мастер-классларга  “булгарик”лар ярдәмендә бушка керәчәкләр. Сугышларны карар өчен дә иң яхшы урыннар аларга тәкъдим ителәчәк.
Урта гасыр костюмына багышланган бәйге кагыйдәләре буенча фестиваль дәвамында бөтен гаиләсе белән урта гасыр костюмын киеп йөргән кешеләргә дә өстенлекләр каралган.
Әлеге бәйгедә катнашып, фестивальгә тарихи костюмнардан килгән гаиләләр бу бәйрәмнең VIP-кунаклары, дип саналачак. Чөнки аларга иң яхшы урыннар каралган, гади кунаклар өчен ишекләре ябык булган җирләргә дә алар керә алачак. Шулай ук алар Бөек Болгар җирлегендәге әйберләрдән чиратсыз һәм бушлай файдалана алачак. Алар чыннан да үзләрен 14-15 гасыр кешеләре итеп хис итәчәк.
Шулай ук эмоцияләр конкурсы да оештырыла. Анда катнашыр өчен былтыр фестивальгә баруыңны һәм андагы хис-кичерешләреңне сурәтләгән “Эмоцияләр бәйгесе” бар. Ә социаль челтәрләрдәге репостлар конкурсындагы җиңүчеләргә урта гасырдагы чып-чын арбалет, Алтын Урда чоры билбавы тапшырылачак.
Урта гасырдагы сугышларны күрергә Красноярск, Санкт-Петербург, Краснодар, Сыктывкар кебек ерак шәһәрләрдән дә тамашачылар киләчәк.
Татарстанның дүрт шәһәреннән рейслар булачак. Казан, Яр Чаллы, Түбән Кама, Әлмәттән махсус автобуслар җибәреләчәк. Ләкин кунакларга билетларны алдан ук алып куярга кушалар. Аларны http://www.bulgarfest.ru сайты аша да алып була. Автобуслар расписаниесе дә шунда язылган.