2018 елгы кышкы Олимпия уеннарында катнашачак Россия җыелмасына 690 спортчы кергән

2018 елның 9-25 февралендә Көньяк Кореяның Пхенчхан шәһәрендә кышкы Олимпия уеннары узачак.  Анда катнашачак Россия җыелма командасына 690 спортчы кергән.

2018 елга кадәр бу спортчыларның төрле ярышлардагы күрсәткечләренә карап, бу исемлек төгәлләштерелеп торачак, дип хәбәр итә ТАСС.
“690 спортчыдан торган беренчел исемлекне кышкы спорт төрләре буенча федерацияләр үзләре төзеде, – ди Россия Олимпия комитетының олимпия уеннарына әзерлеккә ярдәм итү идарәсе җитәкчесе Александр Грушин. – Бу исемлек спортчылар ярышларда күрсәткән нәтиҗәләргә карап, әле үзгәртелергә дә мөмкин".